Tólf prósenta aukning í umsóknum um frádrátt frá tekjum erlendra sérfræðinga milli ára
Á árinu 2023 voru afgreiddar 303 umsóknir um frádrátt frá tekjum erlendra sérfræðinga, sem er 12% aukning miðað við árið áður.
Heimild til frádráttar frá tekjum erlendra sérfræðinga felur í sér að þau sem uppfylla ákveðin skilyrði geta nýtt heimild í tekjuskattslögunum. Heimildin kveður á um að einungis 75% tekna þeirra eru tekjuskattsskyldar, bæði í staðgreiðslu og við endanlega álagningu, fyrstu þrjú árin í starfi. Umsóknir eru metnar með tilliti til menntunarstigs, sérþekkingar, reynslu og fjárhæðar launa og fleiri þátta.
Á árinu 2023 voru afgreiddar 303 umsóknir sem er 12% aukning frá fyrra ári. 247 umsóknir voru samþykktar en 56 var hafnað sem gerir hlutfall samþykktra umsókna um 81%.
Heimild til frádráttar frá tekjum erlendra sérfræðinga hefur verið í gildi frá árinu 2017 og fram til ársloka 2023 hafa borist tæplega 1.200 umsóknir.
Nánar um umsækjendur árið 2023
Karlar voru í meirihluta umsækjanda eða 61% á móti 39% kvenna. Munurinn lækkar á milli ára en árið 2022 voru karlar 66% af umsækjendum og konur 34%.
| Umsóknir (Hlutfall kynja) | % |
|---|---|
| Karlar | 61% |
| Konur | 39% |
| Umsóknir (Hlutfall menntunarstigs) | % |
|---|---|
| Doktorspróf | 29% |
| Meistarapróf | 48% |
| Bakkalárpróf | 19% |
| Tegund vinnustaðar (Hlutfall umsókna) | % |
|---|---|
| Fyrirtæki | 64% |
| Stofnanir | 20% |
| Háskólar | 14% |
| Annað | 2% |
Nánar um meðferð umsókna
Sækja þarf um heimild til frádráttar á heimasíðu Rannís og metur sérstök nefnd hvort umsækjandi teljist sérfræðingur í skilningi laganna og hvort skilyrði þeirra séu uppfyllt að öðru leyti. Nefndin hélt 17 bókaða fundi á árinu 2023 og sem fyrr segir afgreiddi alls 303 umsóknir. Í nefndinni sitja Hallgrímur Jónasson fyrrverandi forstöðumaður Rannís, formaður, Ingibjörg Helga Helgadóttir sérfræðingur í fjármála- og efnahagsráðuneytinu og Ína Dögg Eyþórsdóttir verkefnisstjóri ENIC/NARIC Matsskrifstofu.
