Námsstyrkjum úr UK-Iceland Explorer sjóðnum úthlutað í fyrsta sinn
Fyrr á árinu var í fyrsta skipti auglýst eftir umsóknum um UK-Iceland Explorer námsstyrki, en sjóðurinn var settur á laggirnar til að styðja við samstarf milli Bretlands og Íslands á sviði háskólamenntunar og þjálfunar. Styrkjum hefur nú verið úthlutað til fjögurra Íslendinga sem hefja framhaldsnám í Bretlandi nú í haust.
-
Sendiherra Breta á Íslandi, Dr Bryony Mathew, ásamt þremur styrkhafanna, Arnheiði, Rakel Björt og Viktori, og þeim Aðalheiði og Rúnu frá Rannís.
Styrkhafarnir ársins heita Rakel Björt Helgadóttir, Viktor Ellingsson, Arnheiður Gróa Björnsdóttir Hafberg og Bolli Steinn Huginsson. Þau sýndu með framúrskarandi umsóknum sínum og frammistöðu í viðtölum að áform þeirra um nám í Bretlandi falla vel að markmiðum sjóðsins og eru líkleg til að hafa mikinn ávinning í för með sér, bæði persónulegan og samfélagslegan. Hver styrkur hljóðar upp á £ 10.000.
UK-Iceland Explorer námsstyrkjasjóðurinn styður við íslenska nemendur sem vilja stunda nám eða þjálfun í Bretlandi. Geimferðastofnun Bretlands, UK Space Agency, veitir styrkina í samstarfi við Rannís, breska sendiráðið í Reykjavík og íslensk yfirvöld. Styrkhafar eiga kost á launaðri starfsþjálfun við breskt fyrirtæki eða stofnun innan ramma SPIN-áætlunarinnar. Næst verður auglýst eftir umsóknum í upphafi árs 2023.
Við óskum styrkhöfunum hjartanlega til hamingju með styrkveitinguna og vonum að námsdvölin í Bretlandi verði þeim til mikils gagns og ánægju.
Á myndinni má sjá sendiherra Breta á Íslandi, Dr Bryony Mathew, ásamt þremur styrkhafanna, Arnheiði, Rakel Björt og Viktori, og þeim Aðalheiði og Rúnu frá Rannís.
