Að streyma viðburðum á netinu: Vísindavika norðurslóða 2020
Vísindavika norðurslóða er nú yfirstaðin og heppnaðist hún mjög vel. Viðburðir hennar fóru fram með öðru sniði en stefnt var að vegna samkomubanns, en þeim var
eingöngu streymt á netinu.
Rannís, Alþjóðlega Norðurskautsvísindanefndin (e. IASC) og Háskólinn á Akureyri stóðu að skipulagi Vísindavikunnar sem er jafnframt hluti af formennskuáætlun Íslands í Norðurskautsráðinu.
Dagskrá Vísindavikunnar skiptist í þrjá megin þætti:
- Fundir og viðburðir sem tengjast starfsemi IASC, m.a. ráðstefna um vísindi í þágu sjálfbærni á norðurslóðum:
Vinnufundir hjá öðrum samtökum um málefni norðurslóða
- Ráðstefna um athuganir og vöktun á norðurslóðum (Arctic Observing Summit (AOS): Upptökur ásamt öðru efni eru aðgengilegar á heimasíðu AOS
Fyrir þá sem vilja glöggva sig frekar á efnisskrá Vísindavikunnar og helstu niðurstöðum hennar:
- Science for a Sustainable Arctic: Allar upptökur eru aðgengilegar á YouTube-rás IASC .
- Vinnufundir Alþjóðlegu norðurskautvísindanefndarinnar (IASC): Vinsamlegast hafi samband við skipuleggjendur hvers fundar fyrir sig, sé óskað eftir frekari upplýsingum.
- Arctic Observing Summit (AOS): Upptökur ásamt öðru efni eru aðgengilegar á heimasíðu AOS.
Nánari upplýsingar um dagskrá er hægt að nálgast á vefsíðu Vísindavikunnar og allar upptökur frá dagskránni eru aðgengilegar á YouTube rás IASC.
Skýrsla um framkvæmdina
Skipuleggjendur vísindavikunnar hafa tekið saman skýrslu, Moving a Conference from Iceland to Zoom, um framkvæmdina og þann lærdóm sem má draga af því að flytja slíkan viðburð yfir á netið. Yfir 650 þátttakendur frá 28 löndum skráðu sig á ríflega 75 málstofur og fundi, 10 pallborðsumræður, fimm yfirlitserindi og tvær veggspjaldakynningar. Samræður um sjálfbær samfélög og sameiginlegar áskoranir voru fyrirferðarmiklar í allri dagskránni en meðal þeirra sem tóku til máls voru vísindamenn, sérfræðingar, embættismenn, fulltrúar frumbyggja sem og fulltrúar annarra íbúa á norðurslóðum.
Skýrslan fjallar um ákvarðanatökuna við að streyma dagskránni á netinu, s.s. mannafla og kostnað í því sambandi. Einnig er greint frá skráningu þátttakenda, samskiptaformi og stuðningi á netinu dagskrárefni og áskoranir vegna tímamismunar. Þá eru einnig greindar niðurstöður könnunar meðal þátttakenda á árangri Vísindavikunnar þar sem fram kemur að ríflega 75% þátttakenda lýstu ánægju sinni með framkvæmd Vísindavikunnar. Skýrslan greinir í einstökum atriðum hvað gekk vel í framkvæmdinni og hvað hefði betur mátt fara. Hún ætti því að koma að gagni fyrir þá sem eru að skipuleggja streymi viðburða á netinu.
Rannís vill að endingu þakka öllum þeim sem tóku þátt í ráðstefnunni fyrir sitt framlag.
