Midbik - umhverfisvænt, kalt viðgerðarmalbik - verkefni lokið
Fréttatilkynning verkefnisstjóra
Markmið verkefnisins var þróun vélar sem framleiðir sérhæft, kalt, umhverfisvænt viðgerðarmalbik, fyrir íslenskar aðstæður og er sérsniðin að endurnýjanlegum orkugjöfum.
Framleiðsluvél og malbik af þessu tagi
hefur ekki verið framleitt áður í heiminum svo vitað sé til og því er
nýsköpunargildi verkefnisins mikið auk þess sem alþjóðlegir einkaleyfis- og
skölunarmöguleikar eru til staðar hvað varðar framleiðsluvélina sjálfa.
Tæknilegar niðurstöður verkefnisins sýna fram á að afkastageta framleiðsluvélarinnar getur farið vel yfir 1000 tonna framleiðslu á ári, sem er yfir væntingum. Þar spilar rétt stjórnun á hita og rakalosun meginhlutverk. Ljóst er að þurrkun steinefnis með þessum hætti er líklegt til að verða notuð í meira mæli, ekki síst nú þegar flutningskostnaður og umfjöllun um kolefnisspor er nú í hæstu hæðum um heim allan og samkeppnishæfni framleiðsluaðferðarinnar stenst vel alla samkeppnislega þætti auk þess að styðja við hið opinbera sem og einkaaðila, sem hafa vegaframkvæmdir á sinni könnu, að ná markmiðum sínum um lágmörkun kolefnisfótspors.
Nýting afraksturseininga hvað varðar viðgerðarblönduna er þegar hafin, en efnið er til sölu í smásölupakkningum hjá Húsasmiðjunni auk þess sem stórnotendur geta keypt viðgerðarmalbik beint af Midbik ehf . Sú markaðssókn mun halda áfram með auknum þunga ekki síst í ljósi framfara á uppfærslu tæknibúnaðar og steinefnablöndu og þannig er fyrirtækið enn betur í stakk búið að anna eftirspurn. Einnig er í bígerð að Midbik setji af stað viðgerðarþjónustu á malbiki með eigið viðgerðarefni í farteskinu. Umleitanir um hver eftirspurn slíkrar þjónustu gæti orðið, hefur gefið góðar vísbendingar um aðsókn nærliggjandi sveitarfélaga auk Vegagerðarinnar. Útflutningur viðgerðarblöndunnar er á teikniborðinu og nánari athuganir á hugverkavernd framleiðsluvélarinnar eru fyrirhugaðar.
HEITI VERKEFNIS: Midbik - umhverfisvænt, kalt viðgerðarmalbik
Verkefnisstjóri: Brynjar Örn Sigurðsson
Styrkþegi: Midbik ehf.
Tegund styrks: Sproti
Fjöldi styrkára: 2
Fjárhæð styrks: 20.000.000 ISL kr. alls
VERKEFNIÐ VAR STYRKT AF TÆKNIÞRÓUNARSJÓÐI.
