Námskeið í Norðurlandamálum - nýtt tækifæri í Nordplus!
Nordplus Norræna tungumálaáætlunin hefur kynnt nýjan verkefnaflokk fyrir 2025: Námskeið í Norðurlandamálum. Markmiðið er að efla nám og kennslu í Norðurlandamálum. Styrkir eru í boði fyrir fjölbreyttar stofnanir, þar á meðal háskóla, skóla, félagasamtök og fyrirtæki, sem skipuleggja námskeið fyrir háskólanema, kennaranema og menntaða kennara. Sérstök áhersla er lögð á skandinavísku málin: dönsku, norsku og sænsku.
Nordplus Norræna tungumálaáætlunin, sem er ein af undiráætlunum Nordplus, kynnir nýjan verkefnaflokk fyrir árið 2025: Námskeið í Norðurlandamálum. Markmið þessa nýja verkefnaflokks er að styðja við kennslu og nám í Norðurlandamálum, efla tungumálakunnáttu milli Norðurlanda og varðveita sameiginlegan tungumálaarf svæðisins.
Hverjir geta sótt um styrki?
Í þessum nýja verkefnaflokki er víðtækur hópur stofnana gjaldgengur til að sækja um styrki, meðal annars: skólar, háskólar, fullorðinsfræðslustofnanir, frjáls félagasamtök, tengslanet o.s.frv.
Stofnanir og samtök frá átta Norðurlöndum og Eystrasaltslöndum (Danmörku, Eistlandi, Finnlandi, Íslandi, Lettlandi, Litháen, Noregi og Svíþjóð) ásamt þremur sjálfstjórnarsvæðum (Grænlandi, Færeyjum og Álandseyjum) geta fengið styrki úr Nordplus.
Markhópur námskeiðanna:
- Háskólanemar
- Kennaranemar
- Menntaðir kennarar
Áhersla á skandinavísku tungumálin
Námskeiðin skulu fjalla um eitt af tungumálum Norðurlandanna: dönsku, finnsku, færeysku, grænlensku, íslensku, norsku, samísku eða sænsku. Sérstök áhersla verður lögð á skandinavísku málin (dönsku, norsku og sænsku).
Fjölbreytt námskeiðsform og stuðningur til lengri tíma
Námskeiðin geta verið allt frá tveggja daga vinnustofum eða málstofum upp í mánaðarlöng námskeið. Hægt er að sækja um styrki til að halda eitt eða fleiri námskeið á tveggja ára tímabili með möguleika á áframhaldandi styrkveitingum til annarra tveggja ára.
Sækja um styrk
Stofnanir sem vilja skipuleggja Námskeið í Norðurlandamálum eru hvattar til að sækja um í næsta umsóknarfresti Nordplus Norrænu tungumálaáætlunarinnar þann 3. febrúar 2025. Þetta nýja tækifæri gefur kost á að þróa vandað tungumálanám sem styrkir tungumálakunnáttu á Norðurlöndum og stuðlar að varðveislu menningararfs svæðisins.
Frekari upplýsingar um umsóknarferlið og styrkveitingar er að finna á heimasíðu Nordplus
