Mennta- og menningamálaráðherra skipar sjóðnum þriggja manna tónlistarráð til þriggja ára í senn. Einn stjórnarmaður er tilnefndur af Samtóni og tveir skipaðir án tilnefningar. Tónlistarráð gerir tillögu til mennta- og menningarmálaráðherra um úthlutun, sem úthlutar styrkjum úr Tónlistarsjóði. Fjárveiting sjóðsins er ákveðin í fjárlögum hvers árs.
Tónlistarráð auglýsir eftir umsóknum tvisvar á ári, á vorin og haustin. Umsóknarfrestur vegna verkefna fyrri hluta árs er í nóvember árið á undan og seinni umsóknarfrestur vegna verkefna seinni hluta árs er í maí.
Styrkir úr Tónlistarsjóði skulu veittir til ákveðinna verkefna og að jafnaði ekki lengur en til eins árs í senn. Að jafnaði er hvorki gert ráð fyrir styrkveitingum til rekstrar og umsýslu samtaka, fyrirtækja og stofnana, sem hljóta regluleg rekstrarframlög, né til verkefna eða viðburða sem þegar hafa átt sér stað.
