Spurt og svarað

Vinsamlegast hjálpið okkur að uppfæra þessa síðu um „spurt og svarað“. Sendið okkur línu ef þið eruð með spurningu almenns eðlis og finnið ekki svar við henni hér eða fannst svarið ekki nógu skýrt.
listamannalaun@rannis.is 

Hverjir geta sótt um?

• Sjálfstætt starfandi listamenn. Hönnuðir, myndlistarmenn, rithöfundar, sviðslistafólk, tónlistarflytjendur og tónskáld.
• Einstaklingar sækja um laun: Ef fleiri en einn að starfa að sama verkefni sækir hver og einn um fyrir sig en tilgreinir samstarfslistafólk og umsóknarnúmer þess í sinni umsókn. Sviðslistahópar sækja um í gegnum umsókn Sviðslistasjóðs . 

Má sækja um á ensku?

• Já.

Hvaða vafra er best að nota og hverja á að forðast?

• Fyrir Windows notendur er mælt með Google Chrome. Fyrir Mac er mælt með nýjum útgáfum af Safari.
• Ekki er mælt með því að nota Internet Explorer eða Microsoft Edge.
• Ekki vera með meira en eina umsókn opna í einu.

Hvernig er umsóknarkerfið?

• Notast er við rafræn skilríki. Hægt er að stofna fleiri en eina umsókn en aðeins skal skila inn einni í hvern sjóð (sjá spurninguna "Skila ég inn einni umsókn eða fleiri").
  
• Umsókn verður ekki gild fyrr en ýtt er á „senda inn“ á lokasíðu umsóknarformsins (5.1).
  Þar er hægt að skoða umsókn í pdf skjali.
  
• Vistið eftir hvert skref (síðu) í umsóknarforminu.
  
• Ef farið er út úr umsókn er hægt að fara inn aftur á mínum síðum. Umsóknir í vinnslu er fremst þegar komið er inn á mínar síður.
  
• Umsóknarblaðið leiðir umsækjanda áfram (síður í umsókn valdar í rauða-borðanum efst) og margir reitir eru skyldureitir – úthlutanir fyrri ára koma sjálfkrafa fram.
• Aðgang að umsóknarkerfinu er að finna á forsíðu sjóðsins.

Hver er umsóknarfrestur? Get ég lent í vandræðum á lokadegi?

• Eindregið er mælt með að sækja um með góðum fyrirvara og forðast tímaþröng á síðasta degi.
  
• Á lokadegi getur kerfið orðið þungt í vöfum vegna álags og hugsanlega leitt til vandræða við frágang umsóknar.
  
• Ef umsækjandi lendir í tæknilegum vandræðum tengdum umsóknarkerfi Rannís þarf að TILKYNNA það með tölvupósti ÁÐUR EN UMSÓKNARFRESTI LÝKUR og helst að láta skjáskot sem sýna vandamálið fylgja með. Kvartanir um tæknileg vandamál sem berast eftir að umsóknarfrestur er liðinn verða ekki teknar til greina. 
• Vandamál ótengd umsóknarkerfi Rannís eru ekki tekin til greina og vísað til þess að opið er fyrir umsóknir í 6 vikur eða lengur. 
  

Skila ég inn einni umsókn eða fleiri?

• Listamaður getur aðeins sent inn eina umsókn í sama launasjóðinn. Ætli listamaður að vinna að ólíkum verkefnum (t.d. ljóðabók og skáldsögu) tilgreinir hann þau í einni og sömu umsókninni. Komi inn fleiri en ein umsókn frá listamanni í sama sjóð, gildir aðeins ein umsókn, sú nýjasta.
  
• Ef listamaður er með verkefni á fleiri en einu sviði (t.d. myndlistar og tónskálda), getur viðkomandi sent inn umsókn í sitt hvorn sjóðinn fyrir það verkefni sem við á (t.d. myndlistarverkefnið í launasjóð myndlistarmanna og tónskáldaverkefnið í launasjóð tónskálda).

Fylgigögn - hvernig á að skila þeim inn?

• Fylgigögn verða að koma með umsókninni í gegnum umsóknarkerfið. 
• Ekki er tekið á móti fylgigögnum eftir að umsóknarfrestur er liðinn.
• Fylgigögn sem hengd eru við umsókn verða að vera á PDF formi en einnig er hægt að vísa á gögn með tenglum. 

Ég get ekki sent umsóknina inn, hvað á ég að gera?

• Byrja á að skoða villuprófun umsóknar á síðustu síðu (4. Skoða og skila inn) og ef við á fara á þær síður sem vísað er til, laga, vista síðu og reyna síðan aftur að senda. 
• Athuga hvort búið sé að haka í hakboxið fyrir ofan "Skila inn umsókn" hnappinn til að staðfesta að umsókn hafi verið yfirfarin (hnappurinn er óvirkur þar til staðfest er að umsókn sé yfirfarin). 
• Ef eitthvað annað er að hindra sendingu hafðu þá samband, s: 515 5838 eða 515 5839.
• Ef umsækjandi er að senda umsókn á síðustu stundu og lendir í tæknilegum vandræðum tengdum umsóknarkerfi Rannís þarf að TILKYNNA það með tölvupósti ÁÐUR EN UMSÓKNARFRESTI LÝKUR og helst að láta skjáskot sem sýna vandamálið fylgja með. Kvartanir um tæknileg vandamál sem berast eftir að umsóknarfrestur er liðinn verða ekki teknar til greina. 
• Vandamál ótengd umsóknarkerfi Rannís eru ekki tekin til greina og vísað til þess að opið er fyrir umsóknir í 6 vikur eða lengur.
  

Hvernig veit ég að umsókn mín sé móttekin?

• Með því að skoða innsendar umsóknar á mínum síðum Rannís (farið í valkostinn "Umsóknir" í rauða borða efst og þar undir "Innsendar"). 

Hvenær get ég átt von á svari?

• Eigi síðar en um miðjan janúar. Allir umsækjendur fá svör. Úthlutun mun einnig birtast á heimasíðu listamannalauna.

Hvernig er launagreiðslum háttað?

• Í umsókn er beðið um bankaupplýsingar og áætlaðan upphafsmánuð vinnu. Fáist úthlutun hefjast launagreiðslur í áætluðum upphafsmánuði nema óskað sé eftir öðru. Hægt er að senda inn beiðni um að fresta töku launa en það þarf að gerast fljótlega eftir að úthlutun er tilkynnt. Um verktakagreiðslur er að ræða.

Sviðslistasjóður og listamannalaun - tengist þetta?

• Já. 
• Umsókn í Sviðslistasjóð felur í sér umsókn vegna kostnaðar við uppsetningu verkefnis og getur falið í sér umsókn í launasjóðs sviðslistafólks fyrir þátttakendur.
  
• Aðeins er skilað einni umsókn fyrir hópinn í heild í Sviðslistasjóð .

Hver er upphæð listamannalauna og fjöldi mánaða til úthlutunar?

• Samkvæmt lögum um listamannalaun gildir að:
• Starfslaun skulu nema 266.737 kr. á mánuði á verðlagi fjárlaga 2009. 
  Listamannalaun sem úthlutað er fyrir árið 2024 eru 538.000 kr. á mánuði. 
• Launasjóður hönnuða veitir árlega starfslaun sem svara til 50 mánaðarlauna.
  
• Launasjóður myndlistarmanna veitir árlega starfslaun sem svara til 435 mánaðarlauna.
  
• Launasjóður rithöfunda veitir árlega starfslaun sem svara til 555 mánaðarlauna.
  
• Launasjóður sviðslistafólks veitir árlega starfslaun sem svara til 190 mánaðarlauna.
  
• Launasjóður tónlistarflytjenda veitir árlega starfslaun sem svara til 180 mánaðarlauna.
  
• Launasjóður tónskálda veitir árlega starfslaun sem svara til 190 mánaðarlauna.

Hvernig eru úthlutunarnefndir skipaðar?

• Þriggja manna úthlutunarnefndir starfa í hverjum sjóði skv. skipun menningarráðherra. Sjá nánar í grein 3 í reglugerð um listamannalaun .