Vísindavaka 2010

24. september kl. 17-22

Vísindavaka 2010 - stefnumót við vísindamenn verður haldin föstudaginn 24. september nk. í Listasafni Reykjavíkur Í Hafnarhúsinu. Rannís stendur fyrir Vísindavökunni en hún er haldin samtímis í helstu borgum Evrópu í tengslum við Dag evrópska vísindamannsins.

Markmiðið er að vekja áhuga almennings á vísindum og kynna fólkið á bak við þau. Þar fær fólk af öllum fræðasviðum tækifæri til að koma sér og rannsóknum sínum á framfæri á auðskiljanlegan og skemmtilegan hátt enda á Vísindavakan að höfða til alls almennings, ekki síst til fjölskyldna, barna og ungmenna.

Stofnunum, háskólum og fyrirtækjum býðst að taka virkan þátt í hátíðarhöldunum og sækja um að vera með sýningarbás á staðnum með fræðimenn og verkefni eða rannsókn sem áhugavert gæti verið að kynna fyrir almenningi. Vegna takmarkaðs pláss verður fjöldi sýnenda takmarkaður. Hér má sækja skráningareyðublað með ósk um þátttöku.

Í tilefni af fimm ára afmæli Vísindavökunnar á þessu ári verður lögð sérstök áhersla á lifandi og skemmtilegar kynningar sem  jafnvel bjóða upp á þátttöku gesta og einnig verður möguleiki á að vera með atriði á sviði til að sýna almenningi að vísindin eru lifandi og að fræðimenn rokka!